RSS

الاسرار الستة

واجب وصل لي عن طريق الانسان الجميل ياسر
الواجب عنوانه أذكر 6 أسرار قد لا يكتشفها من يقابلك أول مرة
..قوانين الواجب:
1. أذكر اسم من طلب منك حل هذا الواجب
2. أذكر القوانين المتعلقة بهذا الواجب
3. تحدث عن ستة أسرار قد لا يكتشفها من يقابلك للمرة الأولى.
.4. حول هذا الواجب إلى ستة مدونين، وأذكر أسماءهم مع روابط مدوناتهم في موضوعك.
5. اترك تعليق في مدونة من حولت الواجب عليهم، ليعلموا عن هذا الواجب. وعليه ابدأ بسم الله
من خلال عشرتي الطويلة للمدعوة حبيبة القمر اللي هي تبقى انا قدرت اعرف بعض الاسرار واللي نادرا مايكتشفها حد حتى انا شخصيا بتفاجئ اني عرفتها
1- اول الاسرار دي انها كانت خجوله جدا جدا وبطريقه تخنق لدرجة انها لما بتتعرض لموقف يتطلب حسم تحط وشها في الارض وتنسحب بهدوء "ولازلت احتفظ بالخجل الزايد ولكن بداري الموقف في الهزار.. يعني عشان الخنقه وكده "
2- مترددة جدا جدا جدا ولما بحاول اعمل شمشون الجبار واخد قرار سريع مش بكون راضيه عن النتيجه حتى وان تظاهرت بالعكس
3- من صغري كنت احب يكون ليا عالم خاص ممنوع الاقتراب منه منعا باتا سواء روايات او شرايط او الاجندة الخاصة خصوصا الاجنده دى كان يستحيل اسمح لحد يقرب منها وخصوصا أي حاجه كتبتها
" كنت ارى ان ما افعله واكتبه صواب ولا يحتمل الخطأ وبالتالي مش محتاجه اسمع رأي او نصيحة من حد"
ودلوقتي بقيت العكس تماما مش في مسألة العالم الخاص ولكن فيما يخص كتاباتي اصبحت احب ان اسمع رأي الجميع فيما كتبت ولا اخجل اطلاقا من سماع النقد والتوجيه حتى وان خالف وجهة نظري .
4- كثير من الناس ربنا يبارك فيهم بيعتقدوا اني مثقفة وافهم في كل حاجه وبيبهرهم اسلوبي في التفكير وانا بحب اصدقهم هههههههههه
لكن بصراحه كتير بحس اني جاهله جدا وان اختى الاصغر مني تفهم عني حتى اني بتعلم منها امور من البديهي اكون عارفاها
وبقولها دايما انا اختك الصغيرة معلش استحملي جهلي وفهميني بالراحه وطبعا بتعد تضحك وتستغرب وتفكر اني بهرج " سبحان الله حتى اختي مش مقتنعه ".
5- كنت بخاف موووووووووووت من الضلمة وبكره اكون لوحدى في مكان وممكن من كتر خوفي وجبني تحصلي كوابيس وحاله من الشلل المؤقت.
ولكن بقدرة قادر اصبحت الان افضل الليل عن النهار واستمتع جدا لو سهرت لوحدي وياسلام لو كان القمر فارش نوره على صفحة السما في ليلة صافيه والاجمل ان الوقت ياخدني لبعد الفجر واشوف لحظة الشروق يا الله عالمتعة بحس اني بتولد من جديد.
6- سر الاسرار واخر الاسرار وابشعها على الاطلاق واللي حقيقي مش عارفه سره ايه لكن بحاول الا وهو
" عندي قدرة عجيبه وغريبة اني ازعل اغلى الناس واعز الناس في اكتر الاوقات اللي بكون محتاجه ليهم فيها"
يمكن قلة عقل او اني محبش احسس حد بضعفي
ولكن اللي يعرفوني كويس مش بياخدوا عليا وبيسامحوني بسرعه
بكده انا افشيت بعض اسرار حبيبة القمر بس محدش يقولها اني قلت حاجه
استنوا فيه سر كمان زياده عشان تعرفوا كرم الاسماعلاوية بتاعي
" بجد بجد حبيبة ( اللى هو انا يعني )بتحبكم كلكم في الله ونفسها تتعرف عليكم وتشوفكم فرد فرد وبتدعيلكم كلكم بدوام الصحة والعافية وراحة البال"
بشكرك يا ياسر لتمريرك الواجب الجميل
وبدوري بمرر الواجب لكل من
1- صديقتي الغالية امل صاحبة مدونة شمس اللقاء
2- البنوته اللي بموت فيها زوزو
3- سيدة الحرف والكلمه الرقيقة كاميليا
4- الاديب العاشق او التنين المحارب عرفه باشا
5- شفقه واحسان اللي مدونتهم بتموتني ضحك
6- واخيرا صاحب القلم المميز د. احمد وجه جديد
بشكركم جدا
دمتم بخير وسعاده

  • Digg
  • Del.icio.us
  • StumbleUpon
  • Reddit
  • RSS

وداعا دميتي

اشكرك ايها الفارس الغير نبيل
فقد استطعت ان ترشدني في دربي..
وكنت خير معين .. ( بالطبع بدون قصد منك) لأفيق قبل ان اصل لطريق هلاكي ..
لم اتخيل اني سأجد نهاية طريقي بهذه السرعه !
وإن كنت اتألم قليلا لأجلك طبعا (فأنا مرهفة الحس كما تعلم او لا تعلم )..
برغم اني تعودت على الالم فصار رفيقي الا ان حزني عليك لا على نفسي
بفضل معاونتك واساليبك الماكرة ..اجتزت تلك المراحل بأقصر الطرق ..
نعم فقد ساعدتك على التمثيل وكنت ابرع منك فجعلتك تصدق اني اصدقك ..
انها لعبه ما اسهلها
لا انكر ان قلبي وعقلي كادا يعلنان العصيان على افعالي ويخبراك بحقيقة فعلتي الشنيعه
ولكني تفوقت عليهم وبرعت اكثر واكثر ..
واصدقك القول( حقا) فقد استمتعت بتلك المسرحيه الهزليه حينما تركتك تعتقد انك بالفعل فارس شهم
فكنت اشعر اني احركك كالدمية بين يدي ...و كنت اتفنن في تزيف مشاعري اليك ...
وانت بحماقتك وثقتك العمياء في براعتك ومكرك الاثم
كنت تصدق هذه الخزعبلات والخرافات ...
وكثير قصصي التي الفتها عن هيامى بك
وبسحر عينيك التى يقفز منها الكذب وكأنه في سباق
اااه يا مسكين اتعلم اني كنت اذوب عطشا نعم ..
كدت اتخيل اني سأروي ظمئي من ذلك النهر الاثم
ولكن هيهات فما شربت الخمر يوما
وما احببت السكارى
ولا تمنيت ان اصير منهم فما اوهى دنياهم وما ادناهم في اعين العقلاء.
عذرا ايها المسكين فقد حان لي ان استمع لصوت العقل الذي وأدته منذ عرفتك
وحان لي ان احرر قلبي الذي سجنته في وهم اطلقت عليه اسم العسل المر
وأخيرا نصيحتي لك ..
"ايها المهزوم"
لملم اذيال خيبتك ومابقى لك من اوهام
وارحل عنى
واعلم ان المكر والخداع ما اسهله علينا معشر النساء
فلا تدخل في مضمار لن يكون لك فيه الغلبة ابدااااا وداعا دميتي
******************
همستي هذه المرة كانت قاسيه بعض الشئ
ولكنها رسالتى الى اشباه الرجال
هؤلاء الذين يتوهمون انهم فرسان
ويزيفون المشاعر
فتقع الفتاه فريسه سهله في شباك صائد مغرور
عزيزي الرجل لا تحسب ان المكر والخداع امر صعب
انه اسهل علينا معشر النساء
الم تعلم ان كيدهن عظيم
فحذارى ثم حذارى
ان تستهين بهن

  • Digg
  • Del.icio.us
  • StumbleUpon
  • Reddit
  • RSS

تاج د.أسماء على

السلام عليكم ورحمة الله وبركاته
منذ فترة تم تمرير تاج لي من الغاليه الي قلبي الدكتورة اسماء وهي واحده ممن اعشق حروفهم الى حد الادماااااان
بالطبع تمنيت ان ابوح لكم بالكثير عن ذاتي ولكني اكتشفت اني لا اعلم سوى القليل وللحق لازلت حتى كتابة تلك السطور لم استطع تحديد اجاباتي رغم بساطة الاسئلة "حتى اني استنفذت كل وسائل المساعده"
المهم خرجت لكم بالاتي:
بسم الله
هواياتي :كنت زمان احب الرسم وخصوصا على الزجاج وكنت اندمج جدا واعيش حالة من الجنان الغريب وصراحه كنت اعشق حالة الفوضى التي اسببها من حولي واستمتع بانتباه الجميع لكل خطوة اقوم بها ولا اخفي عليكم فغالبا هناك خسائر(خصوصا من مية النار) لكن الحمد لله ربنا بيلهم امي الصبر مادامت النتيجه ترضيها ودايما كانت تسألني ازاي تعرفي ترسمي وسط الفوضى دي كلها وارد بنوع من الفخروالفرشه في بقى" هما المبدعين كده" هييييييه كانت ايام
كمان كنت بمارس رياضة كرة السله (محدش يفكر اني نخله) هما 169سم لا غير مش كتير يعني
المهم تخليت عن كل دا واصبحت هوايتي وحياتي مع القلم وادمنت التحليق معه في عالم فريد من الاحلام .
اشهر عيوبي: اشهر عيوبي على الاطلاق هي اني لا انسى بسهوله..( سامعه حد بيقول قلبي اسود) من يعرفني جيدا يدرك تماما اني اعطي كل شئ حقه ولا ابخل بمشاعري ابدا فإن احببت احببت بعمق وصدق شديد جدا وقد اهب حياتي وروحي لمن احب (سواء حبيب او صديق )وحتى في العمل ومن قبل في الدراسه ومع ذلك فقد خذلني كل شئ فصرت احتفظ بذكرياتي التى امقتها ولا استطيع نسيانها. حاجات بحبها اوي ومش بمل من تكرارها: بحب اوي اكون لوحدي ومعايا القلم وانفصل عن الواقع واعيش احلام بحسها شبه مستحيله لكني مؤمنه بيها وبحاول احققها بس صراحه غالبا بيصدمني الواقع وبعنف بس برجع اكرر الحكايه دي كتيررررررر بلا كلل او ملل حاجات بكرهها جدا: اكره ان حد يجبرني احكيله حاجه مش عايزة احكيها ... وبكره جدا الوداع ولحظة الفراق لكني موعوده بيه
وبكره جدا اكون مندمجه في اي حاجه وحد يسألنى سؤال او يخرجني من حالة الاندماج دي ..غالبا ممكن احدف طووووووووووب سؤال بيستفزنى جداا: اممممممم مفيش جديد ؟
لما بكون تحت تأثير انفصالي عن الواقع بحس بسعاده غريبه وكل اللي يشوفني يبقى مستني اني اقوله سر سعادتي وتفضل العين مبرقه ليا والبق اوقات كتير يتفتح في بلاهه غريبه وتتقال الكلمه السحريه (المعكنناتيه)ايه هو فيه جديد ولا ايه؟!اجابتي هي الحمد لله ومن جوايا بصرخ (انتو مالكوااااااااا) امنيتي في الحياه: ان اثبت ان الحب موجود وان انعدام المشاعر بين البشر هو سبب في بعد الناس عن بعض واننا بحاجه للايمان بما يفعله الحب من معجزات بجد حاجات مؤمنه بيها جدا : ان الحياه لن تعطيني ما اتمناه وقت ما اطلب... ولكني مؤمنه اني بالصبر والاصرار سأصل الى ما اريد اكتر حاجه فاشله فيها: الحفاظ على من احبهم ..دايما بتفرقنا الاماكن لكنهم بيفضلوا ساكنين جوايا وبعيش معاهم يوم بيوم لكن في خيالى وبس وظيفة احبها: اي مجال قيادي مش بقول لأ... المهم محدش يديني امر .
وعشان كده بحب السيبر بتاعي جداااا لأني مديرة نفسي فيه ولو انه بقى متعب اوى
مثلي الاعلى في الحياه : هو والدي في تفكيره وعقله الكبير وكمان ماما في طيبتها وسماحة قلبها اللى بتمنى اوصل لربعه
اخيرا امرر التاج لمين
صراحه مش عارفه
بس اللى يحب التاج يتفضل والله مش هعزه على حد التاج تاجكم في اي وقت
سمعوني تصفيق حاد لانتهائي بحمد الله من التاج الجميل
ميرسي ياجماعه
دمتم في حفظ الله

  • Digg
  • Del.icio.us
  • StumbleUpon
  • Reddit
  • RSS

اليست حماقه

تعودت الصبر في محراب الهوى
وحين رأيته ما نفعني صبري
بل زاد وجدي من طول النوى
*****
أيا عمرى كفاك انينا
لماذا تتخذ الصمت سبيلا
اخائف انت...؟
اتخشى ان تكون من العاشقينَ
تعالى لنمحو اثار السنينَ
فقد عشت دهرا تبكي القمر الحزينَ
*****
اتاك حبا لا تملك فيه اختيار
حرت في وصفه ونفدت منك الاحبار
فإياك ثم اياك ان تحاول منه الفرار
أيا قلب لك الدنيا فانعم بها
ولا تبالي بكلام او ملام
دع النور يملأ جنبات قلبك
اما تعبت من الظلام..؟؟؟
==============
هل حقا لا نملك الاختيار.. ام اننا نفضل الفرار؟؟
انه الخوف الذي يعترينا ..
احيانا كثيره نتكيف مع الشعور بالوحده
حتى وان كنا نخشاها .. فقد الفناها وصارت لنا رفيقا.
نخشى الفشل .. ولكننا لا نصر على النجاح
وقد نصادف ما يغير واقعنا الحزين ويبدل ظلام دنيانا لنور
ولكننا نراه نارا ونخشى منه الاقتراب
فنصر على ارتداء النظارة السوداء
السنا حمقى؟؟

  • Digg
  • Del.icio.us
  • StumbleUpon
  • Reddit
  • RSS